नेपालमा रवि पक्रिएपछि प्रेम बानियाँले उठाए यस्ता गम्भीर प्रश्न
शालिकराम पुडासैनीको ‘आत्महत्या’ प्रकरणमा रवि लामिछानेलाई प्रहरीले पक्राउ गरेपछि विदेशमा रहेका अर्का चर्चित पत्रकार प्रेम बानियाँले पनि झड्का महसुस गरेका छन् । उनले केही गम्भीर प्रश्नहरु उठाउँदै रवि लामिछानेलाई ‘अति देवत्वकरण’ र ‘अति राक्षसीकरण’ नगर्न सुझाव दिएका छन् ।
पत्रकार प्रेम बानियाँले आफ्नो फेसबुक वालमा रवि लामिछानेलाई ट्याग गर्दै लेखेका छन् :
‘रविजी प्रकरणमा प्रचलित कानुनको सम्मान गर्दै ।
नम्बर १, आत्महत्या गरेको मान्छेको पकेटभित्रको मोबाइलमा रहेको भिडियो ‘इडिटेड भर्सन’मा सार्वजनिक गर्ने कुन प्रहरी अधिकारी हो ? उसलाई कारबाही हुनुपर्छ कि पर्दैन ? यो त अनुसन्धानको विषय थियो र प्रहरी अधिकारीबाहेक अरु कसैले यो सार्वजनिक गर्नै सक्दैन र मिल्दैन ! यदि अपराध पुष्टि भयो भने मात्रै प्रहरीले यसलाई सार्वजनिक गर्न पाउने अन्तर्राष्ट्रिय प्रचलन किन भुलियो ? कुल २३ मिनेटको भनिएको भिडियोमा खोई बाँकी भिडियो ? अरु पनि त आरोपित हुन सक्छन् ।
नम्बर २, भोलि, कोही कसैले कथम्कदाचित, प्रधानमन्त्री ओली, प्रचण्ड वा देउवाका नाममा तिम्रा कारण मैले आत्महत्या गरेको हुँ भनेर पासो लगायो भने उहाँहरु जेल जानुपर्छ कि पर्दैन ?
नम्बर ३, जनहितसम्बन्धी कार्यक्रम प्रसारणको अन्तिम तयारीमा रहेका बेला एउटा पत्रकारलाई कार्यक्रम नै प्रस्तुत गर्न नदिई न्यूजरूमबाट केवल डेढ घण्टा अगाडि टेलिभिजन स्टेशनमै गएर पक्राउ गर्दा के त्यो न्यायिक हुन्छ ? जबकि उसले सार्वजनिकरुपमा भनिसकेको छ, ‘यदि म दोषी ठहरिए कानुनबमोजिम कारवाही भोग्न तयार छु ।’ भोलि फेरि कसैलाई यस्तै पर्यो भने ???
नम्बर ४, नेपाली पत्रकारितामा यो ‘ग्याङ्फाइट’को इतिहासले नेपाली समाजलाई अति तल गिराएको छ । यसमा हावी अतिवाद रविजी विरोधी र समर्थकले समाजको रंग कुरुप देखिएको छ । अब एउटा बिन्दुमा हामी सबै मिलौं । पत्रकारिता अब सूत्रभन्दा माथि आयो कृपया, सबैले बुझौं ।
यी चार सवालहरुका साथ हामी संसारभरबाट बोल्न तयार छौं । के यी प्रश्नहरु गलत छन् ? अब दुनियाँ साँघुरो भइसक्यो । हामी न्यायका निम्ति जहाँसुकैबाट बोल्न तयार छौं ।
कृपया रविजीलाई ‘अतिदेवत्वकरण र अति राक्षसीकरण नगरौं’ संयमतापूर्वक सम्मानित अदालतको निर्णयको प्रतीक्षा गरौं ।’
